Þjóðhagslega hagkvæmt að Björn segi af sér

Atli Gíslason, þingmaður Vinstri grænna, segir að það sé þjóðhagslega hagkvæmara að halda í yfirmennina hjá embætti lögreglustjórans á Suðurnesjum sem sögðu upp í dag en að Björn Bjarnason haldi áfram störfum sem dómsmálaráðherra.

,,Það er mín skoðun að til að leysa málið og stöðuna sem upp er komin í löggæslumálum hér á landi að Björn segi af sér embætti," segir Atli.

Jóhann R. Bendiktsson, lögreglustjóri á Suðurnesjum, tilkynnti fyrr í dag á fundi með samstarfsmönnum að hann hyggst láta af embætti. Þá hafa þrír lykilstarfsmenn hjá embættinu einnig tilkynnt um afsögn sína. Ástæðan fyrir uppsögn Jóhanns er ákvörðun dómsmálaráðuneytisins að auglýsa stöðu lögreglustjóra á Suðurnesjum til umsóknar án þess að Jóhann hafi sagt upp starfinu. Jóhann hefur gengt embætti lögreglustjóra síðastliðinn fimm ár.

Atli fór á fundinn í dag og segist hafa verið ákaflega sorgmæddur og reiður að honum loknum. Hann segir að ástandið í löggæslumálum sé skelfilegt og það sé einna verst á Suðurnesjum. Þar hafi fólki fjölgað um ríflega 20% á nokkrum árum og faraþegafjöldi í gegnum Keflavíkurflugvöll aukist sem og vöruafgreiðsla. Á sama tíma hafi fjárveitingar til embættis lögreglustjóra á Suðurnesjum staðið í stað.

Eins og staðan er í dag óttast Atli öryggi borgaranna og lögreglumanna. ,,Það er ótrúlegt hvað lögreglan vinnur gott starf undir þessum kringustæðum en erindið þrýtur ef málaflokkurinn verður áfram fjársveltur," segir Atli.

Atli segir að það verði að forgangsraða rétt og tekur heilshugar undir tillögur Stefáns Eiríkissonar, lögreglustjóra á höfuðborgarsvæðinu, sem miða að því að nýta fjárveitingar til löggæslumála betur og með markvissri hætti.