Fjórir lykilstarfsmenn lögreglunnar á Suðurnesjum hætta

Jóhann R. Benediktsson, lögreglu- og tollstjórinn á Suðurnesjum, hefur í dag óskað eftir því við dómsmálaráðuneytið að fá að hætta störfum þann 1. október næstkomandi. Jóhann tilkynnti samstarfsfólki sínu þetta á starfsmannafundi í safnaðarheimili Keflavíkurkirkju í dag. Þá tilkynnti Jóhann einnig að á undanförnum vikum hefðu þrír lykilstarfsmenn hjá embættinu einnig óskað eftir því að hverfa frá störfum á sama tíma. Það eru Eyjólfur Kristjánsson staðgengill hans, Guðni Geir Jónsson fjármálastjóri embættisins og Ásgeir J. Ásgeirsson starfsmannastjóri þess.

Í fréttatilkynningu frá lögreglustjóra segir að aðdragandi málsins sé langur, en ákveðin kaflaskipti hafi orðið í mars þegar dómsmálaráðherra hafi tilkynnt að hann hygðist skipta embættinu upp. Sú ákvörðun ráðherra hafi verið fyrirvaralaus og án nokkurs samráðs við fag- og stéttarfélög eða yfirstjórn embættisins. Ákvörðun ráðherra og aðdragandi hennar hafi mætt mikilli gagnrýni bæði meðal starfsmanna embættisins og annarra og hafi Jóhann tilkynnt að hann myndi hætta störfum ef af uppskiptingunni yrði. Frumvarp til breytinga á tollalögum sem hafi falið í sér fyrrnefnda uppskiptingu hafi verið stöðvað meðförum Alþingis.

Samskiptin við dómsmálaráðuneytið hafa verið stirð

Samskipti ráðuneytisins og embættisins hafi frá þeim tíma verið afar stirð. Embættið hafi á undanförnum mánuðum lagt sig fram við að vinna markvisst að lausn deilunnar og mætt kröfum ráðuneytisins um fjárhagslega aðgreiningu tollgæslu, lögreglu og öryggisdeildar meðan fagleg yfirstjórn þeirra yrði óbreytt. Sú vinna embættisins hafi ekki fengið hljómgrunn innan ráðuneytisins.

„Ítrekaðar tilraunir yfirstjórnar embættisins til að bæta samskipti þess og ráðuneytisins hafa ekki borið árangur og er nú svo komið að algjör trúnaðarbrestur er á milli aðila að mati embættisins. Við þær aðstæður er ljóst að embættið kemur ekki til með að njóta sannmælis og sanngjarnrar meðferðar innan ráðuneytisins. Því metur lögreglu- og tollstjóri stöðuna þannig að nýir stjórnendur, þóknanlegir ráðuneytinu, verði að koma að embættinu. Þannig verði framtíð starfsmanna og starfseminnar tryggð.

Með bréfi dagsettu 8. september sl. var lögreglu- og tollstjóra tilkynnt sú ákvörðun dómsmálaráðherra að staða hans yrði auglýst er skipunartími hans rennur út þann 31. mars næstkomandi. Forsendur þeirrar ákvörðunar voru fyrst kynntar í fjölmiðlum um nýliðna helgi. Þær skýringar eru léttvægar og dæma sig sjálfar," segir í tilkynningunni.

Óskar starfsfólki sínu alls hins besta



Þá segir að lögreglu- og tollstjóri óski starfsmönnum og embættinu alls hins besta í framtíðinni og skori á ráðamenn þjóðarinnar að tryggja að það öfluga og giftusamlega starf sem þar hafi verið unnið fái þann stuðning og skilning sem það verðskuldi. Alvarleg staða löggæslunnar í landinu sé verulegt áhyggjuefni fyrir samfélagið allt og róttækra aðgerða sé þörf ef ekki eigi illa að fara.