Uppsögn Jóhanns kemur Birni á óvart

Björn Bjarnason, dómsmálaráðherra, segir að hann hafi fært fyrir því skýr efnisleg rök þegar þegar hann ákvað að auglýsa embætti lögreglustjóra á Suðurnesjum til umsóknar. ,,Að lögreglustjóri bregðist við á þann veg, sem fyrir liggur, kom mér á óvart," segir Björn í tölvupósti vegna fyrirspurnar Vísis til ráðherra.

Jóhann R. Bendiktsson, fráfarandi lögreglustjóri á Suðurnesjum, tilkynnti fyrr í dag að hann hyggst láta af embætti frá og með 1. október. Þá hafa þrír lykilstarfsmenn hjá embættinu einnig tilkynnt um afsögn sína. Ástæðan fyrir uppsögn Jóhanns er ákvörðun dómsmálaráðuneytisins að auglýsa stöðu lögreglustjóra á Suðurnesjum til umsóknar án þess að Jóhann hafi sagt upp starfinu. Jóhann hefur gengt embætti lögreglustjóra síðastliðinn fimm ár.

Jóhann segir að það hafi orðið trúnaðarbrestur á milli embættis lögreglustjóra á Suðurnesjum og dómsmálaráðuneytisins. Aðspurður hvort hann taki undir með Jóhanni segir Björn: ,,Þegar ég dvaldist erlendis í embættiserindum sá Jóhann R. Benediktsson ástæðu til að ganga á fund staðgengils míns hér heima og gefa til kynna, að hann óskaði eftir starfslokasamningi. Ég lét þetta ekki á mig fá og ræddi við Jóhann strax á Keflavíkurflugvelli við heimkomu mína. Vafalaust hefðu einhverjir túlkað þetta sem trúnaðarbrest en ég gerði það ekki."

Spurður hvort að ákvörðun Jóhanns og þremenninganna muni hafa óæskileg áhrif á löggæslumál á Suðurnesjum segir Björn að lagt verði kapp á að finna nýjan lögreglustjóra sem síðan ráði sitt nánasta samstarfsfólk. Björn treysti því að þeir sem sinni landamæravörslu, tollgæslu, öryggisgæslu og gæta laga og réttar á Suðurnesjum til að sinna störfum sínum af sömu alúð og kostgæfni og áður.

Vísir spurði Björn einnig hvort hann hafi stuðning ríkisstjórnarinnar fyrir fyrirhuguðum breytingum á embætti lögreglustjórans á Suðurnesjum. Svar Björns var eftirfarandi: ,,Ríkisstjórnin samþykkti sl. vor frv. frá fjármálaráðherra um breytinga á skipan tollamála, ég veit ekki annað en ríkisstjórn er enn sama sinnis."