Solskjær: United gæti orðið stórveldi

Norski framherjinn Ole Gunnar Solskjær sem lagði skóna á hilluna í ágúst eftir frábæran feril með Manchester United, segir að lið félagsins í dag gæti stimplað sig inn sem stórveldi í Evrópuboltanum á komandi árum.

Liðið getur tryggt sér frábæra tvennu með sigri á Chelsea í úrslitaleik Meistaradeildarinnar í næstu viku og Solskjær, sem vann þrennuna frægu með United árið 1999, hefur mikla trú á liði Alex Ferguson í dag.

"Vonandi verður þetta upphafið að einhverju enn stærra fyrir félagið," sagði Solskjær í samtali við Manchester Evening News.

"Það var frábær tilfinning að vinna þrefalt árið 1999 og minningar frá úrslitaleiknum í Meistaradeildinni lifa að eilífu. Ég vona að liðið verði Evrópumeistari á ný og að það komi tiltrú í leikmennina, því ég held að þetta lið hafi alla burði til að verða stórveldi á næstu árum," sagði Norðmaðurinn, sem skoraði sigurmarkið gegn Bayern Munchen í sögulegum úrslitaleik 1999.