Capello ánægður með Terry

Fabio Capello ætlar að gefa leikmönnum Manchester United og Chelsea í enska landsliðinu frí frá æfingaleiknum við Trínídad á fimmtudaginn. Hann var sáttur við frammistöðu enska landsliðsins í 2-0 sigrinum á Bandaríkjamönnum á Wembley í kvöld.

"Sjö leikmenn munu ekki fara með okkur til Trínídad og þeirra tímabili er því lokið í bili. Þeir þurfa á hvíldinni að halda," sagið Capello eftir leikinn í kvöld.

Þeir sem fá frí frá næsta leik verða því John Terry, Ashley Cole, Frank Lampard, Wayne Rooney, Owen Hargreaves, Rio Ferdinand og Wes Brown.

Capello var annars ánægður með leik enska liðsins í kvöld, þrátt fyrir að margir vildu meina að bandaríska liðið hefði verið frekar slappt.

"Ég er mjög ánægður því þetta bandaríska lið er sterkt. Það er skipulagt og erfitt ða brjóta á bak aftur. Við spiluðum með góðri einbeitingu og náðum að klára litlu hlutina vel," sagði Capello.

Hann var ánægður fyrir hönd John Terry fyrirliða, sem hlaut uppreisn æru frá úrslitaleiknum í meistaradeildinni með því að skora fyrra mark enska liðsins.

"Ég er mjög ánægður fyrir hönd bæði Terry og enska landsliðsins. Það var frábært fyrir John að enda tímabilið á því að skora. Hann er góður fyrirliði og lék vel í dag," sagði Ítalinn í samtali við Sky.