Leikmenn Arsenal og Tottenham deila íbúð

Jafnan er grunnt á því góða á milli erkifjendanna Arsenal og Tottenham í norðurhluta Lundúna. Eina stóra undantekningu er þó að finna á þeirri reglu.

Hinn ungi og efnilegi Aaron Ramsey hjá Arsenal deilir þannig íbúð í London með landa sínum Chris Gunter hjá Tottenham, en þeir koma báðir frá Wales og voru samherjar hjá Cardiff.

Ramsey er 17 ára og Gunter er 19 ára og þeir hafa deilt íbúð síðan sá fyrrnefndi var keyptur frá Cardiff til Arsenal fyrir fimm milljónir punda í júní.

"Við komum báðir upp hjá Cardiff á svipuðum tíma og höfum því þekkst í nokkur ár núna. Hann kom til London í janúar þegar hann samdi við Spurs og bauð mér að búa með sér þegar ég kom hingað. Mér fannst það upplagt og hann hefur hjálpað mér mikið að koma mér fyrir," sagði Ramsey í samtali við Sun.