Konur myndu auka gæði leiksins

David James, markvörður Portsmouth og enska landsliðsins, segir að konur geti vel keppt við karlmenn í knattspyrnu. Hann segir þær geta aukið gæði leiksins og séu í mörgum tilvikum duglegri en karlarnir.

"Ég held að konur gætu alveg spilað með körlum í fótbolta. Ég er ekki að segja að kona gæti orðið besti leikmaður í heimi, því líkamlegur munur á kynjunum er talsverður, en ég held að konur gætu alveg keppt á móti körlum í fótbolta. Ég hef horft á mikið af fótbolta og ég er t.d. alveg viss um að margar konurnar myndu leggja sig betur fram en sumir karlarnir sem ég hef séð á vellinum. Ég held að gæði leiksins myndu batna til muna ef konur kæmu inn, "sagði James í samtali við Sun.