Segir ráðherra hafa lofað 400 milljörðum inn í framtíðina

Deilt var á ráðherra ríkisstjórnarinnar á Alþingi í dag fyrir að skrifa undir samninga við ýmsa aðila nú skömmu fyrir kosningar án þess að leita til Alþingis um fjárveitingar vegna þeirra. Benti fyrirspyrjandinn, Lúðvík Bergvinsson, Samfylkingunni, á að samkvæmt hans samantekt hefðu ráðherrar að undanförnu lofað um 400 milljörðum króna í fjárveitingar til ýmissa mála inn í framtíðina, þar á meðal samkvæmt samgönguáætlun.

Geir H. Haarde forsætisráðherra benti á að mörg þau mál sem samningar hefðu verið gerðir væru lögbundin og þannig skylt að gera, þar á meðal samgönguáætlun, samningur við Háskóla Íslands og sauðfjársamningur. Benti hann einnig á að stjórnarandstaðan hefði verið dugleg að gera kröfur um fjárveitingar til ýmissa mála, til að mynda málefna aldraðra.

Sagði Geir að ráðherrar væru æðstu handhafar opinbers vald og ákvarðanir ráðherra hefðu lagagildi. Það væri skýrt að þeir gætu ekki stofnað til fjárskuldbindinga nema fyrir því væri heimild í lögum. Að sama skapi væri aðeins hægt að fella ákvarðanir úr gildi með lagabreytingum.

Nokkrir þingmenn stjórnarandstöðunnar tóku til máls í kjölfarið og bentu á að ekki væri hægt að skrifa undir samninga við aðila um fjárveitingar nema til þess hefði fengist heimild frá alþingi sem hefði fjárveitingarvaldið. Sagði Jón Bjarnason, þingmaður Vinstri - grænna, að það væri ábyrgðarhluti að skrifa undir fjárveitingar sem þingið hefði ekki samþykkt og að slíkt væri á mörkum hins siðlega.

Lúðvík Bergvinsson kom aftur í pontu og sagði athyglisvert að forsætisráðherra segði að ákvarðanir ráðherra hefðu lagagildi, sérstaklega í ljósi þess að Geir hefði sem fjármálaráðherra sagt árið 2002 að ekki væri hægt að skuldbinda ríkissjóð með kosningabombum eins og hann orðaði það. Sagði Lúðvík kosningavíxla ekki hafa neitt gildi fyrr en Alþingi hefði veitt fjármagn til þeirra.

Geir H. Haarde kom einnig aftur í pontu og sagðist gera athugasemd við orðalag. Ákvarðanir ráðherra hefðu ekki fullt lagagildi heldur fullt gildi að lögum. Auðvitað hefði Alþingi lokaorðið um fjárveitingar til einstakra málaflokka og gerðir væru fyrirvarar í samningum um samþykki Alþingis. Hann hefði haldið að öllum væri ljóst að samþykki Alþingis þyrfti.