Kínverjar fallast á að gagnrýna Búrma

Kínverjar slógust í lið með Vesturveldunum í Öryggisráði Sameinuðu þjóðanna í kvöld þegar ráðið samþykkti yfirlýsingu um málefni Búrma. Þetta er í fyrsta sinn sem Kínverjar fást til að gagnrýna stjórnvöld Búrma en í yfirslýsingunni er það fordæmt hvernig mótmæli í landinu á dögunum voru barin niður. Þá skorar öryggisráðið á stjórnvöld í landinu að láta pólitíska fanga lausa og að teknar verði upp viðræður við leiðtoga andstöðunnar, Aung San Suu Kyi.

Yfirlýsing frá Öryggisráðinu hefur ekki sömu vikt og ályktanir ráðsins en engu að síður er sagt að stjórnvöld í Búrma einangrist enn frekar í kjölfarið þar sem yfirlýsingin er samþykkt af öllum 15 aðildarríkjum ráðsins. Öryggisráðinu hefur ekki áður tekist að koma sér saman um yfirlýsingu í málinu þar sem Kínverjar hafa hingað til ávallt beitt neitunarvaldi sínu.