Ten Cate sparkaði í afturenda Mourinho

Henk Ten Cate gæti verið á leið til Chelsea en fyrir tveimur árum komst hann í fréttirnar fyrir að sparka í afturenda Jose Mourinho.

Ten Cate var þá aðstoðarþjálfari hjá Barcelona og atvikið átti sér stað í göngunum á Nou Camp eftir leik Börsunga og Chelsea í Meistaradeildinni.

Nú er Ten Cate á leið til Stamford Bridge og mun taka við þjálfun Chelsea, eftir því sem The Sun og fleiri miðlar greina frá.

Avram Grant verður áfram knattspyrnustjóri en Ten Cate mun stýra æfingum og undirbúningi liðsins.

The Sun segir að Ten Cate verði boðinn þriggja ára samningur og 40 þúsund pund í vikulaun.

Hollendingurinn Henk Ten Cate er ekkert lamb til að leika við. Hann er nú þjálfari Ajax en var áður hægrihandarmaður Frank Rijkaard hjá Barcelona.

Ten Cate er ekki hræddur við að láta menn heyra það og mun sjálfsagt ekki hlífa stórstjörnum Chelsea neitt sérstaklega.

Sparkspekingar hafa líka haldið því fram að Ten Cate hafi verið maðurinn á bak við sigur Börsunga í spænsku deildinni og Meistaradeildinni árið 2006 - ekki Rijkaard.

Gengi Börsunga undanfarna tólf mánuði virðast renna stoðum undir þá kenningu.

„Við söknuðum gömlu góðu níðingskasta Ten Cate sem hann veitti okkur þegar við þurftum á því að halda. Brjálæðisköst hans voru vel skipulögð,“ sagði Ludovic Giuly sem fór frá Barcelona í sumar til Roma.