Owen fer ekki fet

Glenn Roeder, þjálfari Newcastle, segir að Michael Owen sé ekki á förum frá Newcastle, en enski sóknarmaðurinn var sagður óánægður í enskum fjölmiðlum um að liðið spili ekki í Evrópukeppni á næsta ári. Newcastle er í 11. sæti deildarinnar og þarf kraftaverk til að komast í Evrópukeppni en Roeder segir Owen ekki óánægðan í herbúðum liðsins.

Owen er ennþá að jafna sig af krossbandssliti sem hann varð fyrir í leik Englendinga og Svía á HM í Þýskalandi sl. sumar og mun líklega ekki spila á ný fyrr en á næstu leiktíð. Roeder þvertekur fyrir meinta ónægju Owen og segist munu verða "mjög hissa" ef Owen spilar annarsstaðar en hjá Newcastle á næsta tímabili.

"Ef það verður engin Evrópubolti hjá Newcastle á næstu leiktíð þá verður það næsta tímabil þar á eftir. Ég tala við Michael alla daga og við erum í mjög góðu sambandi. Hann, eins og allir aðrir leikmenn liðsins, vilja vera í sigurliði og við höfum allir trú á að við getum unnið eitthvað hjá þessu félagi," segir Roeder.