55 þúsund manns mættu á Wembley

55 þúsund manns sáu ungmennalið Englendinga og Ítala gera 3-3 jafntefli í fyrsta opinbera knattspyrnuleiknum sem fram fer á nýjum Wembley-leikvangi í Lundúnum. Þetta var aðsóknarmesti U-21 árs landsleikur sögunnar, en miðar á leikinn seldust upp eins og heitar lummur á mettíma.

Það var í raun "uppselt" á landsleikinn í dag, því ekki mátti selja fleiri en 55 þúsund miða á leikinn. Eftirspurnin eftir miðum var hins vegar svo mikil að þeir seldust upp á nokkrum klukkustundum, enda Lundúnabúar flestir mjög spenntir fyrir því að líta hinn nýja þjóðarleikvang augum. Aldri í sögunni hafa fleiri áhorfendur fylst með leik viðureign U-21 árs liða.

Leikurinn var einskonar generalprufa fyrir úrslitaleik ensku bikarkeppninnar, en vonir eru bundnar við að sá leikur geti farið fram á Wembley, og þá fyrir framan 90 þúsund áhorfendur.

Leikurinn sjálfur var hinn fjörugasti og skoraði Giampaolo Pazzini þrennu fyrir ítalska liðið. David Bentley, Matt Derbyshire og Wayne Routledge skoruðu mörk Englands.