Keegan hættur þjálfun

Kevin Keegan segist ekki búast við því að hann muni taka við knattspyrnustjórn félagsliðs á nýjan leik.

Keegan hætti með Manchester City í mars árið 2005 og rekur nú knattspyrnuskóla í Glasgow.

„Ég á ekki von á því að ég fari aftur í þjálfun. Líf mitt hefur tekið aðra stefnu,“ sagði Keegan í viðtali við BBC. „Það er þó aldrei að vita. Ég fæ reglulega tilboð en ég hef tekið þá ákvörðun að gera eitthvað annað í mínu lífi.“

„Ég hef ekki einu sinni farið á leik síðan ég stýrði mínum síðasta leik með Manchester City og ég man ekki einu sinni hver andstæðingurinn var.“

Keegan er einn þekktasti knattspyrnumaður Bretlandseyja frá upphafi. Hann varð fjórum sinnum deildarmeistari með Liverpool og Hamburg og einu sinni Evrópumeistari. Hann var tvívegis kjörinn knattspyrnumaður Evrópu og lék samtals 63 landsleiki.

Hann stýrði á sínum ferli enska landsliðinu, Newcastle, Fulham og Manchester City.