Norskir símaklefar friðlýstir

Hundrað rauðir símaklefar í Noregi hafa verið friðlýstir að ákvörðun stjórnvalda.

Símaklefarnir voru hannaðir árið 1932 af norska arkitektinum Georg Fredrik Fasting og hafa verið í notkun í óbreyttri mynd í 75 ár, að sögn Davids Brand hjá Norska fjarskiptasafninu.

Næstum 6.000 símaklefar voru í notkun víða um Noreg allt fram á níunda áratuginn en einungis 420 þeirra standa eftir í dag.

Stefnt er að því að halda þessum hundrað símaklefum í notkun. Auk sögulegs gildis þess að vernda símaklefana segir Brand að minnsta kosti eina praktíska ástæðu fyrir hendi þó að flestir eigi farsíma í dag: tómar rafhlöður.