Ronaldo: Ég er einn af þeim bestu

Cristiano Ronaldo leiðist ekki að tala um eigið ágæti sem knattspyrnumaður þessa dagana. Ekki er langt síðan hann titlaði sjálfan sig sem "of góðan" og eftir að hafa skorað tvö mörk fyrir Portúgal gegn Belgum um helgina sagði Ronaldo við portúgalska fjölmiðla að hann væri einn af besti leikmönnum í heimi.

"Er ég sá besti í heimi? Það er ekki fyrir mig að svara. Ég hef verið að bæta mig og ég er í frábæru formi. Mér finnst ég hafa þroskast," sagði Ronaldo í fyrstu þegar hann svaraði spurningu portúgalska blaðamannsins, en bætti síðan við: "En auðvitað tel ég mig vera í hópi þeirra bestu."

Ronaldo notaði einnig tækifærið og ítrekaði hollustu sína við Manchester United. Ronaldo segist vilja vera hjá Old Trafford í mörg ár til viðbótar. "Ég er með góðan samning við félagið og það sem skiptir mig mestu máli er að sýna hvað ég get. Það er gott að vita að ég er eftirsóttur því það þýðir að ég sé að gera eitthvað rétt. En ég er mjög ánægður hjá Manchester United."