Solskjær ánægður með að fá Tevez til United

Norðmaðurinn Ole Gunnar Solskjær, framherji Manchester United, segir að leikmenn liðsins séu mjög spenntir fyrir að fá Argentínumanninn Carlos Tevez til liðsins. Tevez bíður nú eftir að hann verði löglegur með liðinu og vonast er til að hann geti spilað gegn Reading á sunnudaginn.

Þrátt fyrir að meiri samkeppni verði um sæti í framlínu United þegar Tevez kemur tekur Solskjær honum fagnandi. „Ég hef verið hjá klúbbnum í ellefu ár og margir frábærir leikmenn hafa komið á þeim tíma," sagði Solskjær við SkySports. „Maður verður bara ánægður þegar nýr leikmaður kemur og ég vona bara að Carlos fái leikheimild sem fyrst."

Solskjær segir það ekki skapa vandræði að Tevez sé of líkur Wayne Rooney, en mikið hefur verið talað um að þeir muni ekki geta náð vel saman. „Engir tveir leikmenn eru nákvæmlega eins. Allir voru að tala um að Andy Cole og Dwight Yorke myndu ekki geta spilað saman, en við vitum öll hvað var mikið til í þeim getgátum."