Máli Tevez seinkar enn

Enn dragast félagaskipi Carlos Tevez í Manchester United á langinn. Talið var að frá þeim yrði gengið í dag og að Tevez gæti leikið með sínu nýja liði gegn Reading í fyrstu umferð ensku úrvalsdeildarinnar á laugardag. Sky Sports greindi frá því rétt í þessu að af því verði ekki og Tevez verði ekki löglegur með United um næstu helgi.

Samningurinn sem flytur Tevez frá West Ham til Manchester United er nokkuð flókinn. Hann er svipaður samningnum sem Javier Mascherano gerði við Liverpool á síðustu leiktíð en það tók lögfræðinga Enska knattspyrnusambandsins nokkrar vikur að leggja blessun sína á hann. Í samningnum segir að United fái Tevez að láni í tvö ár áður en þeir ganga endanlega frá kaupum á leikmanninum.

Vonir standa til að málinu verði lokið fyrir helgi en takist það ekki verður Tevez að gera sér það að góða að sitja í áhorfendastúkunni þegar Enska úrvalsdeildin hefst á laugardag.