Giggs á nóg eftir

Andrei Kanchelskis, fyrrum leikmaður Manchester United, segir að Ryan Giggs geti spilað í fremstu röð í nokkur ár í viðbót. Sjálfur hætti Kanchelskis knattspyrnuiðkun þegar hann var 38 ára og segir að Giggs ætti að geta það líka.

Giggs er 33 ára gamall. „Það kemur mér ekki á óvart að Ryan sé enn á fullri ferð. Hann er frábær atvinnumaður sem hefur farið vel með sig. Ég hætti sjálfur í fyrra. Ég vildi hætta í efstu deild í Rússlandi í stað þess að fara að leika í neðri deildum. Ég held að Ryan geri það sama, en það verður ekki strax," sagði Kanchelskis.

„Ég fylgist vel með enska boltanum og reyni að horfa á alla leiki United. Ryan hefur enn fínan hraða og er líka mjög snjall leikmaður. Hann er klárlega nægilega góður fyrir þennan styrkleika."