Jol: Seljum Berbatov ekki fyrir 40 milljónir

Martin Jol stjóri Tottenham, segir að félagið myndi aldrei geta hugsað sér að selja framherjann Dimitar Berbatov - ekki einu sinni þó það fengi 30-40 milljón punda tilboð í hann. Jol segir Búlgarann magnaða minna sig á Johan Cuyff.

Tottenham keypti Berbatov frá Bayer Leverkusen á 11 milljónir punda í sumar og hefur hann slegið í gegn hjá liðinu í vetur. "Berbatov er maður sem myndi kosta 30-40 milljónir á markaðnum í dag en við munum aldrei selja hann. Berbatov minnir mig á Johan Cruyff, því hann gerir allt vel í framlínunni," sagði Jol.

Vitað er að Manchester United sýndi Berbatov áhuga áður en hann fór til Tottenham, en framherjinn ákvað að ganga frekar í raðir Lundúnaliðsins. "Sir Alex var að fylgjast með mér á sínum tíma og við áttum stuttan fund. Ég ákvað hinsvegar að fara til Tottenham og sé ekkert eftir því. Nú geta forráðamenn Manchester United bara horft á mig spila með Tottenham þar sem ég er með fjögurra ára samning. Koman hingað hefur verið rétt skref á ferlinum fyrir mig," sagði Búlgarinn, sem hefur skorað 17 mörk fyrir liðið í vetur.