Kevin Nolan: Allardyce er ekki að taka við öðru liði

Kevin Nolan, fyrirliði Bolton, segist enn vera í miklu uppnámi vegna ákvörðunar Sam Allardyce að hætta sem knattspyrnustjóri hjá félaginu. Hann segist hlakka til þess að spila fyrir Sammy Lee, en fullvissar alla um að Allardyce hafi ekki verið að hætta hjá félaginu til að taka við stöðu knattspyrnustjóra hjá öðru liði í úrvalsdeildinni. Hann hefur verið orðaður við stjórastöðuna hjá Manchester City.

"Ég hlakka til að vera partur af framtíð Bolton undir stjórn nýja stjórans og ég veit að Allardyce er ekki að hætta til að taka strax við öðru liði. Hann hringdi í mig skömmu áður en þetta var tilkynnt og ég fékk algjört áfall. Ég mun sennilega ekki gera mér almennilega grein fyrir þessum tíðindum fyrr en eftir eina eða tvær vikur. Það er kominn tími til fyrir Sam að sinna fjölskyldunni og taka sér smá frí frá leiknum - hann verður kannski kominn með eitthvað annað að gera á næsta tímabili," sagði Nolan.