Rijkaard í stað Mourinho strax í vor?

Enska blaðið Independent segir að Hollendingurinn Frank Rijkaard sé efstur á óskalista Romans Abramovic sem næsti knattspyrnustjóri Chelsea. Það er ekki bara í tilhugalífi Romans sem gustar því sambúðin við Jose Mourniho þykir stormasöm. Jason Burt blaðamaður Independent reiknar með því að Abramovic reki Mourinho í sumar.

Sá rússneski er sagður vilja fá Rijkaard til þess að breyta um leiktíl hjá enska liðinu. Abramovic vill fá skemmtilegri fótbolta fyrir alla peningana sem hann hefur dælt í Chelsea. Rijkaard er sagður þægilegri í umgengi en Mourinho. Mourinho þarf ekki að hafa áhyggur af auraleysi verði hann rekinn. Samningur hans rennur ekki út fyrr en 2010 og fyrir 685 milljónir króna á ári er líklega hægt að gera ýmislegt.

Fyrir utan Rijkaard eru 4 aðrir knattspyrnustjórar nefndir sem hugsanlegir eftirmenn Mourinhos; Didier Deschamps, Guus Hddink, Juande Ramos og Roberto Mancini. Deschamps er kunnugur öllum krókum og kimum hjá Lundúnaliðinu en hann lék með félaginu fyrir nokkrum árum. Hann stýrði Monakó en er núna að gera fína hluti með Juventus í ítölsku 2. deildinni. Roberto Mancini á Ítalíumeistaratitilinn vísan með Internazionale, Guus Hiddink þjálfar rússneska landsliðið og hefur oft verið orðaður við Chelsea. Juande Ramos stýrir Sevilla og undir hans stjórn urðu Spánverjarnir Evrópumeistarar félagsliða í fyrra. Ramos getur mátað sig í starfið þegar hann stýrir Sevilla í 8-liða úrslitum gegn Tottenham í næsta mánuði. Hann þykir snjall stjóri, orðinn 56 ára og samtals stýrt 11 liðum á löngum ferli.