Kaldar kveðjur frá Persson valda usla

Yfirlýsingagleði Görans Persson, fyrrverandi forsætisráðherra Svíþjóðar, í sjónvarpsþætti á mánudagskvöldið hafa valdið töluverðu fjaðrafoki í sænskum stjórnmálum. Persson fór þar hörðum orðum um Monu Sahlin, Carl Bildt og fleiri stjórnmálamenn, jafnt samherja sem andstæðinga.

Persson virðist ekki hafa mikið álit á Sahlin, sem tók við formennsku í Jafnaðarmannaflokknum um síðustu helgi – stöðu sem Persson gegndi í rúman áratug.

„Styrkur hennar liggur ekki í skarpri hugsun heldur í því að koma skilaboðum áleiðis,“ sagði Persson um hana árið 1997. „Hún er álitin hæfari í stjórnmálum en hún raunverulega er.“

Sjónvarpsþátturinn, sem sýndur var á mánudag, er sá fyrsti í röð þátta sem eru byggðir á viðtölum sem fréttamaðurinn Erik Fichtelius tók við Persson á síðustu ellefu árum. Þeir hittust fimm til sex sinnum á ári, alls 57 sinnum, og upptökurnar eru samtals meira en hundrað klukkustundir. Persson mætti í viðtölin með því skilyrði að ekkert yrði birt fyrr en eftir að hann væri hættur í embætti.

„Bildt er svo fjári vondur,“ sagði Persson árið 1999 um Carl Bildt, núverandi utanríkisráðherra. „Ég veit ekki hvert hann ætlar að fara og hvað hann ætlar að gera. Ég vorkenni honum.“

Carl Bildt var forsætisráðherra Svíþjóðar 1991-94 og sagði af sér sem formaður hægri flokksins Moderaterna árið 1999 eftir að hafa tapað kosningum gegn Jafnaðarmönnum undir forystu Perssons.

„Mér finnst ég bera ábyrgð á honum,“ sagði Persson. „Við höfum boðið honum nokkur störf en hann hefur hafnað þeim.“

Þá er Persson ómyrkur í máli um Gudrun Schyman, fyrrverandi leiðtoga Vinstriflokksins, sem Jafnaðarmenn störfuðu með árum saman.

„Ég myndi ekki treysta henni ef kreppa steðjaði að Svíþjóð,“ sagði Persson. „Hún virðist vera frekar tætt og lítt þroskuð, oft hefur hún ekki þekkingu á málefnum.“

Hann segir að hún hafi misst stjórn á sér einu sinni á fundi flokksleiðtoga áður en Svíþjóð tók við formennsku í Evrópusambandinu. Þegar talið barst að vændi hrópaði hún æst: „Þið karlar skulið sko ekki halda að þið komist upp með að ríða bara hverjum sem er.“

„Þetta var mjög undarleg uppá-koma,“ sagði Persson í sjónvarpsþættinum.