Alves á leið til Manchester City

Brasilíska markamaskínan Afonso Alves er á leið til Manchester City samkvæmt hollenskum fjölmiðlum.

Alves var nálægt því að fara frá hollenska félaginu Heerenveen í sumar en nú virðist sem svo að hann fari til Englands í janúar næstkomandi.

Eigandi Heerenveen mun hafa hitt eiganda Manchester City, Thaksin Shinawatra, í Amsterdam í gær þar sem þeir ræddu um möguleg félagskipti.

Núverandi samningur Alves rennur út í lok tímabilsins 2011 og þarf því Shinawatra að opna veskið til að fá hann til City. Samkvæmt fregnum í Hollandi mun kaupverðið vera um 20 milljónir evra.

Alves var kjörinn besti maður hollensku úrvalsdeildarinnar á síðasta tímabili og hefur alls skorað 47 mörk í 46 leikjum með félaginu. Á þessu tímabili hefur hann skorað tíu mörk í sex leikjum, þar af sjö í einum og sama leiknum.