West Ham kastaði frá sér sigrinum

West Ham og Bolton skildu jöfn á Upton Park í dag en jöfnunarmark Bolton kom á þriðju mínútu uppbótartímans.

Kevin Nolan jafnaði metin en George McCartney hafði komið West Ham yfir í fyrri hálfleik.

Bolton er þó enn í næstneðsta sæti deildarinnar með sjö stig en West Ham er í því ellefta með fimmtán stig.

Nicolas Anelka var enn frá vegna meiðsla en Gary Megson, stjóri Bolton, þurfti nauðsynlega á sigri að halda, þeim fyrsta undir sinni stjórn.

Meiðsli hrjá West Ham sem fyrr en tólf leikmenn úr liðinu eru á meiðslalistanum.

West Ham byrjaði betur en Lee Bowyer var duglegur að skapa usla í vörn Bolton. Hann átti skot úr ágætu færi á 12. mínútu en missti illa marks. Kannski sem betur fer var hann dæmdur rangstæður.

En fyrsta markið kom á nítjándu mínútu. West Ham átti horn og mistókst varnarmönnum Bolton að hreinsa boltann frá marki. George McCartney fékk boltann og skoraði með laglegu skoti.

Bolton átti ekki mikið í leiknum en Danny Guthrie átti gott skot að marki á 31. mínútu sem hafnaði í stöng West Ham-marksins.

Í kjölfarið komst Bolton betur inn í leikinn og átti Boa Morte gott skot sem fór þó yfir markið. Ekki tókst gestunum þó að jafna metin fyrir leikhlé.

Nokkur hálffæri litu dagsins ljós í seinni hálfleik en fyrsta alvöru færið fékk Carlton Cole þegar hann skaut beint á Jussi Jaaskelainen í marki Bolton.

West Ham slapp þó með skrekkinn í uppbótartíma er John Pantsil bjargaði á línu frá Kevin Nolan.

En Nolan skoraði svo jöfnunarmarkið dýrmæta á 93. mínútu. Sendingin kom frá hægri og svo skallaði Lubomir Michalik inn í teiginn þar sem Nolan náði að slæma fætinum í boltann og í netið.