City að kaupa króatískan varnarmann fyrir 8,7 milljónir punda?

Samkvæmt fréttamiðlum í Króatíu hefur Manchester City náð samkomulagi við Dinamo Zagreb um kaup á varnarmanninum Vedran Corluka. Kaupverðið er talið vera um 8,7 milljónir punda. Corluka þarf þó að fá atvinnuleyfi áður en gengið er frá kaupunum.

Sven Göran Erikson, framkvæmdastjóri City, hefur verið duglegur að fjárfesta í leikmönnum síðan hann tók við liðinu í sumar en nú þegar hefur hann keypt Martin Petrov, Rolando Bianchi, Gelson Fernandes og Geovanni. Þar að auki er hann nálægt því að klófesta bakvörðinn Javi Garrido frá Real Sociedad og framherjann Valeri Bojinov frá Fiorentina.