Reynir að bæta ímynd Bandaríkjanna

George W. Bush Bandaríkjaforseti hélt í gær af stað í vikuferð um fimm ríki í Suður-Ameríku. Bush ætlar að bæta ímynd Bandaríkjanna og vinna gegn vaxandi áhrifum vinstri kempunnar Hugo Chavez, forseta Venesúela.

Bush hyggst flytja þann boðskap að lýðræðisfyrirkomulag hafi jafnan í för með sér velferð íbúanna.

„Ferðin er farin til þess að minna fólk á það að okkur stendur ekki á sama,“ sagði Bush í sjónvarpsviðtali á miðvikudaginn. Hann sagðist hafa áhyggjur af því að margir telji Bandaríkin ekki hafa veitt Suður-Ameríku næga athygli.