Bendtner ekki nógu góður

Þrátt fyrir að hafa skorað fyrir Arsenal í tveimur leikjum á undirbúningstímabilinu telur knattspyrnustjóri Arsenal, Arsene Wenger, að danski landsliðsmaðurinn Nicklas Bendtner sé ekki nógu góður til þess að vera í byrjunarliðinu.

Bendtner skoraði í leikjum Arsenal gegn Lazio og Paris St. Germain og Danir voru að binda vonir við að hann myndi fá tækifæri með úrvalsdeildarliðinu. Haft er eftir Wenger í BT að Arsenal eigi marga sterka sóknarmenn og því verði Bendtner að bíða eftir sínu tækifæri. Eftir söluna á Thierry Henry og vegna meiðsla Emmanuel Adebayor gæti bið Danans eftir sæti í byrjunarliðinu orðið styttri.

Bendtner er 19 ára og hann stóð sig vel með Birmingham í 1. deildinni á síðustu leiktíð en hann skoraði 11 mörk í 42 leikjum.