Arteta er leikmaður 14. umferðar

Mikel Arteta, leikmaður Everton, var maðurinn á bak við 7-1 sigur sinna manna á Sunderland um helgina og er leikmaður 14. umferðar ensku úrvalsdeildarinnar.

David Moyes, stjóri Everton, hældi Arteta mikið eftir leikinn. „Frammistaða Arteta í fyrri hálfleik var töfrum líkust," sagði Moyes. „Hann skapaði frábær marktækifæri og er ótrúlegt að hann sé nýbúinn að jafna sig á meiðslum. Þegar hann er upp á sitt besta stenst honum enginn snúning."

Arteta skoraði reyndar ekki í leiknum en hann stjórnaði spili liðsins eins og hershöfðingi. Moyes sagði einnig eftir leikinn að hann hafi aldrei séð Everton spila eins vel síðan hann tók við liðinu.

Mikel Arteta er 25 ára gamall Spánverji sem kemur frá Baskalandi. Fimmtán ára gamall gekk hann til liðs við unglingaliðs Barcelona þar sem hann var í þrjú ár. Hann var svo lánaður til Paris Saint-Germain árið 2000 og dvaldi í tvö ár í Frakklandi.

Þá var hann keyptur til Rangers í Skotlandi þar sem hann sló í gegn á sínu fyrsta tímabili. Hann vann sér fljótt sæti í byrjunarliðinu og var í miklu uppáhaldi hjá stuðningsmönnum liðsins. Hann átti erfitt uppdráttar á seinna tímabili sínu hjá félaginu vegna meiðsla en á sínum tíma þar vann hann skosku deildina með Rangers, sem og bikarinn og deildabikarinn.

Árið 2004 gekk hann til liðs við Real Sociedad í heimalandi sínum þar sem hann féll í skuggann á Xabi Alonso og náði aldrei að festa sinn sess í liðinu.

Ári síðar var hann lánaður til Everton sem keypti hann svo sumarið 2005. Arteta var hugsaður sem eftirmaður Thomas Gravesen og stóð þar svo sannarlega undir væntingum.

Á sínu fyrsta heila tímabili var hann kjörinn leikmaður ársins hjá Everton bæði af leikmönnum og stuðningsmönnum.

Á síðasta tímabili var hann aftur valinn bestur af leikmönnum Everton og í kosningu á heimasíðu Skysports var hann valinn besti miðvallaleikmaður deildarinnar, á kostnað Cristiano Ronaldo.

Hann skrifaði í sumar undir nýjan fimm ára samning við Everton og fyrir skemmstu spilaði hann sinn 100. leik fyrir félagið. Hann er löngu búinn að festa sig í sessi sem einn lykilmanna liðsins og er í miklu uppáhaldi hjá stuðningsmönnum Everton.

Arteta hefur þó ekki enn hlotið náð fyrir augum Luis Aragones, landsliðsþjálfara Spánverja, David Moyes til mikillar furðu.

Nafn: Mikel Amatriain Arteta

Fæddur: 28. mars 1982 í San Sebastían, Guipuscoa, Spáni.

Félög: Paris Saint-Germain, Rangers, Real Sociedad og Everton.

Númer: 6