Keðjureykjandi lögfræðingur í þungarokki

Hann spilar fjárhættuspil, hann keðjureykir, spilar þungarokk, hefur engar taugar og hikar ekki við að koma höggi á andstæðing sinn við hvert tækifæri. Þetta er Slaven Bilic, landsliðsþjálfari Króata í knattspyrnu.

Slaven Bilic leiðir lið sitt inn á Wembley annað kvöld þar sem það mætir Englendingum í lokaleiknum í undankeppni EM. Króatar hafa þegar tryggt sér sæti á EM en Englendingar þurfa að ná hagstæðum úrslitum.

Fyrrum liðsfélagi Bilic hjá West Ham, Alvin Martin, segir að ef hann þekki Bilic rétt - hafi Steve McClaren og félagar hjá enska landsliðinu ekki hugmynd um hverju þeir megi eiga von á í leiknum.

Pókerfés

"Hann var rosalegur í fjárhættuspilunum á sínum tíma," sagði Martin um Bilic þegar þeir spiluðu saman fyrir rúmum áratug. "Það má eiginlega segja að hann hafi verið á heimavelli í pókernum því hann hafði einstaka hæfileika til að blekkja andstæðinga sína og það var aldrei hægt að lesa út hvað hann hafði á hendinni. Hann var aldrei hræddur við að taka stórar áhættur og það er það sem Steve McClaren þarf að hafa áhyggjur af í næsta leik."

Metal-lögfræðingur

Bilic reykir eins og skorsteinn og spilar á gítar í þungarokkshljómsveit. Hann er menntaður lögfræðingur og er búinn að koma Króötum á EM 2008 - ekki slæmt af 39 ára gömlum manni sem var að byrja að þjálfa og var leikmaður fyrir aðeins sex árum síðan.

Pressa er eitthvað sem hefur lítil áhrif á Bilic og þegar hann var spurður út í pressuna á Steve McClaren eftir að Króatar lögðu Englendinga 2-0 á heimavelli í fyrra sagði hann; "Ef þú getur ekki höndlað pressu - ættirðu að finna þér eitthvað annað að gera."

Lúmskur refur

Fyrrum félagi hans Martin segir að sumir hlutir í framkomu Bilic hafi ekki beinlínis verið til fyrirmyndar, en þannig sé hann nú bara - eins og þegar hann fiskaði Laurent Blanc hjá Frökkum af velli í undanúrslitaleik Frakka og Króata á HM árið 1998. Sumir ensku leikmannanna segja líka að þegar hann hafi rétt þeim höndina og boðist til að reisa þá upp eftir að þeir duttu- hafi hann togað af öllu afli í einn af fingrunum á þeim.

"Sumt af því sem hann sýndi á vellinum var kannski ekki til fyrirmyndar og þetta atriði með Laurent Blanc kom mér ekki sérlega á óvart, en það er bara til marks um það hvað hann var útsjónarsamur og lúmskur. Það er þess vegna sem hann er svona góður þjálfari í dag," sagði Martin í samtali við Daily Mail.