Þjálfari Ísraela vill Rússa á EM

Markvarðaþjálfari ísraelska landsliðsins í knattspyrnu segist vilja að Rússar komist áfram á EM í knattspyrnu á kostnað Englendinga. Þetta hefur breska blaðið The Sun eftir honum í dag.

Markvarðaþjálfarrinn Alexander Ubarov er kannski ekki alveg hlutlaus í málinu því hann er fyrrum landsliðsmarkvörður Rússa en hefur ísraelskt vegabréf. Hann segir að þó auðvitað vilji Ísraelsmenn ekki tapa leiknum, yrði það sárabót ef Rússarnir færu á EM í stað Englendinga.

Dagblaðið Sun furðar sig á því að jafnvel gæti komið til greina að Ísraelsmenn tefldu fram ungu og óreyndu liði gegn Rússunum á laugardaginn, þar sem gestirnir gera út um vonir Englendinga um að komast á EM með sigri.

"Ég vil að Rússarnir komist á EM og til þess að svo verði verða þeir auðvitað að vinna hérna í Ísrael. Ég vil að þeir fari áfram, en aðeins ef þeir eiga það skilið," sagði þjálfarinn. Hann vísar því þó á bug að Ísraelsmenn séu að gera Rússum einhverja greiða.

"Ég er búinn að vera hjá ísraelska landsliðinu í 16 ár og það hefur gert sitt besta í hverjum einasta leik. Þetta kemur allt í ljós á knattspyrnuvellinum, hvergi annarsstaðar," sagði Ubarov.