WBA upp í annað sætið

West Bromwich Albion skaust upp í annað sæti ensku 1. deildarinnar í kvöld. Liðið vann Coventry 4-0 á útivelli. Fyrir leikinn var búist við jafnri viðureign enda aðeins þrjú stig sem skildu liðin að.

Eftir aðeins tíu mínútna leik fékk Michael Mifsud, leikmaður Coventry, að líta rauða spjaldið fyrir olnbogaskot.

Þrátt fyrir að leika einum fleiri nánast allan leikinn gekk West Brom erfiðlega að brjóta ísinn og skoraði fyrsta markið ekki fyrr en á 56. mínútu.

Eftir það þá gáfust heimamenn upp. Andrade Filipe Teixeira skoraði tvö af mörkunum en hin skoruðu Paul Robinson og Robert Koren.

Þegar sextán umferðum er lokið í ensku 1. deildinni er Watford efst með 36 stig. West Brom er sex stigum á eftir en Charlton kemur síðan í þriðja sæti með 28 stig.