Öruggur sigur Arsenal á Reading

Arsenal vann 3-1 útisigur á Reading á Madjeski vellinum í kvöld. Mathieu Flamini, Emmanuel Adebayor og Aleksander Hleb skoruðu mörk Arsenal sem er á toppi ensku úrvalsdeildarinnar með jafnmörg stig og Manchester United.

Brynjar Björn Gunnarsson og Ívar Ingimarsson voru báðir í byrjunarliði Reading og léku allan leikinn. Þegar staðan var markalaus átti Brynjar hörkuskot af löngu færi en Manuel Almunia varði vel.

Það tók Arsenal dágóðan tíma að sigrast á varnarmúr heimamanna. Það tókst hinsvegar rétt fyrir leikhlé. Þegar sjö mínútur voru liðnar af seinni hálfleiknum kom annað markið og Hleb skoraði síðan það þriðja tólf mínútum fyrir leikslok.

Nickey Shorey minnkaði muninn fyrir Reading á 87. mínútu. Reading er áfram í tólfta sæti deildarinnar.