Arsenal heimsækir Reading

Einn leikur er í ensku úrvalsdeildinni í kvöld og verður hann að sjálfsögðu í beinni útsendingu á Sýn 2. Reading og Arsenal mætast á Madjeski vellinum en leikurinn hefst klukkan 20:00.

Manchester United vann Blackburn í gær og setti því aukna pressu á Arsenal sem kemst upp að hlið United á toppnum með sigri í kvöld. Reading er í tólfta sæti deildarinnar en liðið hefur sýnt mikinn óstöðugleika á tímabilinu.

„Þetta verður virkilega erfiður leikur. Ef við ætlum að fá eitthvað út úr honum verðum við að vera á tánum í vörninni allan leiktímann. Von okkar felst í skyndisóknum," sagði Steve Coppell, knattspyrnustjóri Reading.

Óvíst er hvort varnarmaðurinn Michael Duberry verði með í kvöld en hann á við meiðsli að stríða. Ef hann verður ekki leikfær er líklegt að Ívar Ingimarsson endurheimti sæti sitt í byrjunarliði Reading en hann hefur að undanförnu mátt verma varamannabekkinn. Brynjar Björn Gunnarsson hefur hinsvegar átt fast sæti í liðinu.

Arsenal hefur unnið alla leiki sem liðið hefur spilað gegn Reading en það eru samtals sjö deildar- og bikarleikir.