Fjörugt jafntefli í toppslagnum

Arsenal og Manchester United skildu jöfn í fjörugum leik á Emirates Stadium í dag. Arsenal náði að jafna metin í uppbótartíma.

William Gallas skoraði sjálfsmark í fyrri hálfleik en Cesc Fabregas jafnaði metin í síðari hálfleik. Cristiano Ronaldo svaraði en Gallas fékk uppreisn æru þegar hann skoraði jöfnunarmarkið seint í leiknum.

Leiknum var sjónvarpað til 202 landa og var talið að jafnvel einn milljarður manna myndu horfa á leikinn. Hann fór þá fremur rólega af stað en Cristiano Ronaldo fékk fyrsta færið.

Það var eftir fyrstu hornspyrnu leiksins sem Wayne Rooney sótti af harðfylgi. Ryan Giggs tók spyrnuna en skalli Ronaldo var ekki hárrétt tímasettur og fór rétt svo framhjá markinu.

Emmanuel Adebayor svaraði um hæl með skalla í næstu sókn Arsenal eftir fyrirgjöf Gael Clichy. Boltinn fór yfir mark United.

Eftir um stundarfjórðungsleik vildu leikmenn Arsenal fá vítaspyrnu þegar Nemanja Vidic virtist toga Alex Hleb niður en Hvítrússinn virtist geysilega öflugur og var skæður í liði Arsenal.

Giggs fékk svo gullið tækifæri til að skora mark eftir fyrirgjöf Ronaldo. Giggs virtist hissa að boltinn hafi náð alla leið til hans þar sem hann stóð við fjarstöngina og náði ekki að gera sér mat úr færinu.

Nokkru síðar fékk Arsenal frábært færi en Edwin van der Saar var vel á verði. Arsenal fékk skyndisókn eftir að hornspyrna Giggs var hreinsuð í burtu. Brotið var á Hleb og tók Cesc Fabregas aukaspyrnuna. Boltinn hafnaði beint á kollinum á William Gallas sem stóð afar stutt frá marki United.

En þá kom loksins að því að mark var skorað. Wes Brown gaf boltann út á kantinn til Ronaldo sem gaf fasta fyrirgjöf á nærstöng Arsenal-marksins. Þar var Rooney í boltanum sem fór þó af hendi Gallas og í markið. Sjálfsmark var það því.

Arsenal var ekki lengi að svara því strax á 48. mínútu jafnar Fabregas metin fyrir Arsenal. Van der Saar varði vel frá Adebayor en Bacary Sagna náði frákastinu og kom boltanum á Fabregas sem skilaði knettinum í markið.

Síðari hálfleikur var mun opnari en sá fyrri og nokkrar efnilegar sóknir litu dagsins ljós. Theo Walcott kom inn á og skapaði nokkurn usla en þegar bæði lið virtust sætta sig við jafntefli áttu gestirnir frábæra sókn.

Louis Saha hafði komið inn á sem varamaður fyrir Carlos Tevez og átti frábæra sendingu á Patrice Evra sem kom í hlaupið inn í teiginn. Hann renndi boltanum út á Ronaldo sem átti í engum vandræðum með því að ýta honum yfir línuna. Stórbrotin sókn hjá United.

Sigurinn virtist tryggður. En síðara jöfnunarmarkið var ótrúlegt. Gallas fékk uppreisn æru þegar hann náði að fylgja eftir skoti samherja að marki sem var varið á línu. Van der Saar varði boltann inn í markinu og kom það ekki í ljós fyrr en nokkrum sekúndum síðar eftir mikinn hamagang í teig United.

En markið stóð og þar með jafnteflið.