Arsenal eitt besta lið sem ég hef leikið gegn

Jose Reina, markvörður Liverpool, segir að enginn vafi sé á því að Arsenal sé eitt sterkasta lið sem hann hafi leikið gegn. Liðin tvö gerðu 1-1 jafntefli í stórleik helgarinnar í enska boltanum.

„Þeir voru hreint frábærir. Við fengum þó okkar tækifæri. Við hefðum ekki átt skilið að vinna leikinn en á hinn bóginn áttum við ekki skilið að tapa. Við börðumst gríðarlega vel," sagði Reina.

„Arsenal var betra liðið í þessum leik og því var þetta klárlega eitt stig unnið hjá okkur frekar en tvö stig töpuð. Við gerðum okkar besta en vorum að leika gegn einu besta fótboltaliði sem ég hef séð."