Shearer: Owen er ánægður

Alan Shearer gefur lítið fyrir þær sögusagnir um að Michael Owen sé óánægður hjá Newcastle og vilji burt.

Nýjustu fregnir herma að Manchester City hafi áhuga á kappanum. En Shearer sagði að það væri ekkert nýtt.

„Hann getur ekki stjórnað því sem er sagt og skrifað um hann," sagði Shearer. „Hann er ánægður hjá Newscastle. Það er erfitt að ætlast til þess að hann spili í hverri einustu viku en hann kom inn á gegn Everton um daginn og skoraði mark. Hann stóð sig vel."

Owen hefur spilað mikið með enska landsliðinu að undanförnu en sífelld meiðsli hafa haldið honum á hliðarlínunni í Newcastle.

„Hann vill spila með landsliðinu og er það enginn glæpur að mínu mati."

England mætir Rússum í Moskvu annað kvöld en leikurinn fer fram á gervigrasi. Shearer hefur áhyggjur af því.

„Ég á erfitt með að skilja að landsleikir eru spilaðir á gervigrasi."