Enska vörnin sú besta í Evrópu

Landslið Englands hefur mátt sæta mikillar gagnrýni að undanförnu heima fyrir en ekki er hægt að þræta fyrir að vörn liðsins hefur staðið sig vel.

Englendingar hafa reyndar unnið fimm leiki í röð en þar á undan tapað fyrir Króatíu og gert markalaus jafntefli við Ísrael á útivelli og Makedóníu heima. Þá fékk Steve McClaren, landsliðsþjálfari, það óþvegið í ensku pressunni en hann hefur nú svarað gagnrýnendum sínum.

Önnur rós í hnappagat hans er sú staðreynd að enska vörnin hefur aðeins fengið á sig tvö mörk í allri keppninni. Þau mörk komu reyndar í sama leiknum, í 2-0 tapleik gegn Króatíu.

Annað þeirra marka var reyndar ótrúlegt sjálfsmark Gary Neville þar sem Paul Robinson ætlaði að sparka boltanum út en hitti hann ekki. Boltinn rann einfaldlega í netið.

Englendingar hafa því haldið hreinu í níu leikjum af tíu í keppninni.

Liðið er þó ekki enn búið að tryggja sig áfram í úrslitakeppni EM 2008. Framundan eru tveir gríðarlega mikilvægir leikir gegn helstu keppinautum sínum í E-riðli.

Á miðvikudag mætir England Rússlandi. Með sigri tryggja þeir ensku að þeir lenda í öðru tveimur toppsætum riðilsins.

Króatía er á toppnum, þremur stigum á undan þeim ensku. Þessi lið mætast í lokaumferð riðilsins og má ætla af markatölu liðanna að Króötum dugir þar jafntefli til að tryggja sér toppsætið.

Leikurinn við Rússa fer fram í Moskvu en leikurinn mikilvægi gegn Króatíu á Wembley.

Þau lið sem hafa fengið á sig eitt mark eða færri að meðaltali í undankeppni EM 2008:

1. England 0,20 mörk á sig að meðaltali (tvö mörk í tíu leikjum)

2. Frakkland 0,30 (3/10)

3. Holland 0,33 (3/9)

4. Króatía 0,40 (4/10)

5. Þýskaland 0,44 (4/9)

- Tékkland 0,44 (4/9)

- Rússland 0,44 (4/9)

- Svíþjóð 0,44 (4/9)

9. Finnland 0,50 (6/12)

10. Rúmenía 0,56 (5/9)

11. Búlgaría 0,67 (6/9)

12. Ítalía 0,70 (7/10)

13. Serbía 0,73 (8/11)

14. Albanía 0,78 (7/9)

15. Skotland 0,80 (8/10)

- Spánn 0,80 (8/10)

17. Portúgal 0,82 (9/11)

18. Pólland 0,83 (10/12)

19. Armenía 0,89 (8/9)

- Noregur 0,89 (8/9)

- Danmörk 0,89 (8/9)

22. Grikkland 1,00 (9/9)

- Tyrkland 1,00 (9/9)