Englendingar spila á martraðavelli

Skoski sóknarmaðurinn Garry O'Connor segir það martröð að spila á Luzhniki vellinum í Rússlandi. Enska landsliðið leikur gegn heimamönnum á þeim velli næsta miðvikudag en um er að ræða gervigrasvöll.

O'Connor er hjá Birmingham en lék í sumar með Lokomotiv Moskvu. „Ég er líklega eini breski leikmaðurinn sem hefur fengið að kynnast þessari hörmung sem þessi völlur er. Það var gaman að spila í Rússlandi en þessi völlur var svartur blettur á veru minni þar," sagði O'Connor.

„Daginn eftir að maður spilar á vellinum er maður allur stirður og getur varla hreyft sig. Ég get varla ímyndað mér hvernig Michael Owen verður eftir að hafa leikið á þessum velli svona skömmu eftir að hafa gengist undir uppskurð."

O'Connor segist ekki skilja það að FIFA leyfi alþjóðlegum leikjum að fara fram á þessum velli.

„Ég held að það sé með vilja gert að þessi völlur varð fyrir valinu hjá rússneska knattspyrnusambandinu. Þeir vilja láta enska liðinu líða illa. Annað sem enska liðið verður að búa sig undir er að völlurinn verður líklega bleyttur vel," sagði O'Connor.