Babel svaf yfir sig í annað sinn

Ryan Babel, leikmaður Liverpool, svaf yfir sig og missti af fundi hollenska landsliðsins fyrir leikinn gegn Rúmeníu í gær. Landsliðsþjálfarinn Marco van Basten var allt annað en sáttur og tók Babel út úr liðinu.

„Þetta er í annað sinn sem hann sefur yfir sig á leikdegi. Það er ekki ásættanlegt. Við ætlumst til þess að leikmenn fylgi okkar dagskrá á leikdegi," sagði van Basten.

Arjen Robben tók sæti í liðinu í stað Babels. Seint í leiknum kom Babel hinsvegar inn sem varamaður en tókst ekki að koma í veg fyrir 1-0 tap hollenska liðsins.