Lampard fékk óblíðar móttökur

Hluti af stuðningsmönnum enska landsliðsins púaði á miðjumanninn Frank Lampard í gær. Enska landsliðið lék á móti Eistlandi og vann 3-0 sigur. Lampard kom af bekknum og fékk óblíðar móttökur.

„Þetta er einfaldlega rangt. Þetta gerir engum gott, hvorki leikmanninum né liðinu," segir John Barnes, fyrrum landsliðsmaður Englands. Barnes fékk sjálfur að kynnast því á sínum ferli að fá svona móttökur.

„Frank er leikmaður Englands og öll viljum við að liðinu vegni sem best. Svona framkoma hefur neikvæð áhrif á aðra leikmenn í liðinu," segir Barnes. Leikurinn í gær var sá fyrsti í fjögur ár þar sem Lampard er klár í slaginn en er ekki í byrjunarliðinu.

Gareth Barry og Steven Gerrard voru saman á miðjunni hjá enska liðinu í gær.