Wenger: Misstum einbeitinguna

Arsene Wenger segir að sínir menn hafi misst einbeitinguna eftir að Arsenal náði snemma 2-0 forskoti gegn Sunderland.

Sunderland jafnaði metin, 2-2, en Robin van Persie skoraði sigurmark leiksins þegar skammt var til leiksloka og tryggði Arsenal sigur.

„Við virtumst sannfærðir um að þetta væri komið eftir fimmtán mínútur. Við misstum einbeitinguna og liðum er refsað fyrir það í þessari deild. En þetta var góð lexía fyrir okkur af því að við sýndum að það býr mjög sterkur karakter í liðinu."

Roy Keane, stjóri Sunderland, var ánægður með sína menn.

„Strákarnir lögðu sig alla fram en maður þarf ansi mikla heppni til að ná góðum úrslitum á velli sem þessum. Við vorum ekki nógu heppnir í dag."