Arsenal hitti Kroenke í gær

Stjórn enska úrvalsdeildarliðsins Arsenal staðfesti að hafa hitt Bandaríkjamanninn Stan Kroenke í gær.

Kroenke hefur lengi verið orðaður við yfirtökutilboð á Arsenal og á nú þegar 12,2 prósent hlutabréfa í félaginu. 

Rússinn Alisher Usmanov hefur einnig mikinn hug á að festa kaup á Arsenal og hefur nú þegar eignast 23 prósent hlutabréfa.

Kroenke hefur nú hitt stjórn Arsenal nokkrum sinnum að máli í þeirri von að koma á góðu samstarfi.

„Fundurinn er liður í því að halda góðum samskiptum við stóra hluthafa í Arsenal,“ sagði í tilkynningu frá stjórn félagsins.

Kronke hefur víða látið til sín taka í Bandaríkjunum og á fjöldamörg íþróttafélög.

Fyrirtæki hans, Kroenke Sports Enterprise, á ruðningsliðin St. Louis Rams og Colorado Crush, NBA-liðið Denver Nuggets, hokkíliðið Colorado Avalanche, lacrosse-liðið Colorado Mammoth og fótboltaliðið Colorado Rapids.

Hann á einnig Pepsi Center-íþróttaleikvanginn þar sem Nuggets, Avalanche, Crush og Mammoth leika heimaleiki sína.

Hann á líka Altitude Sports and Entertainment-íþróttarásina sem sýnir alla heimaleiki liða hans í Colorado í beinni útsendingu. 

Hann er á lista Forbes yfir fjögur hundruð ríkustu menn heims og er talinn vera um 2,1 milljarða dollara virði. Kona hans, Anne Walton, er erfingi Wal-Mart verslunarkeðjunnar.