Elano er leikmaður áttundu umferðar

Hinn brasilíski Elano hefur átt frábæra byrjun á tímabilinu í Englandi með Manchester City. Hann er leikmaður áttundu umferðar deildarinnar.

Frammistaða hans var frábær í leik City gegn Newcastle um helgina og kórónaði hann leikinn með stórkostlegu marki beint úr aukaspyrnu á lokamínútum leiksins.

„Elano er frábær knattspyrnumaður," sagði Sven-Göran Eriksson sem keypti hann í sumar frá Shaktar Donetsk í Úkraínu.

Hann var í Úkraínu í tvö ár og varð fljótlega orðinn lykilmaður í liðinu. Í ágúst árið 2006 varð hann fyrsti leikmaður úkraínsku deildarinnar til að verða valinn í brasilíska landsliðið.

Þar er hann í stóru hlutverki hjá Dunga, nýja landsliðsþjálfaranum, og eru margir á því að hann verði einn daginn landsliðsfyrirliði Brasilíu.

„Hann væri ekki í brasilíska landsliðinu ef hann væri ekki svona góður," sagði Eriksson. „Þegar hann kom fyrst hingað í haust var hann langt frá því að vera í 100 prósent formi. En hann styrkir sig með hverjum leik. Í hvert skipti sem hann fær boltann fær maður það á tilfinninguna að eitthvað muni gerast."

Gott gengi Manchester City undir stjórn Sven-Göran Eriksson hefur komið mjög á óvart og á Elano stóran þátt í því.

„Ég held að við verðum bara betri. Eftir því sem við æfum og spilum meira saman getum við unnið í tæknilegu hlið okkar leiks. Leikmennirnir eru ungir og hungraðir. Ef við höldum áfram á þessari braut er ég ekki í vafa um að tímabilið verði frábært hjá okkur."

Eriksson keypti Elano á átta milljónir punda og það virðist nú vera alger kjarakaup. Lesskilingur hans og sendingageta eru í heimsklassa og í raun ótrúlegt að þessi 26 ára snillingur sé ekki löngu kominn í stórlið á borð við Barcelona, Real Madrid eða AC Milan.

Markið sem Elano skoraði í leiknum um helgina var ótrúlegt. 30 metra þrumufleygur úr aukaspyrnu sem fór beint í hornvinkilinn fjær.

„Það er frábært að sjá svona aukaspyrnu," sagði Eriksson um markið. „Ég hef séð markið í sjónvarpinu og það er varla hægt að taka betri spyrnu. Annars hefði boltinn farið í slána eða stöngina. Þetta var alveg ótrúlegt. Ég óska honum til hamingju með markið og ég held að hann hafi átt þetta skilið."

Nafn: Elano Ralph Blumer

Fæddur: 14. júní, 1981, í Sao Paulu í Brasilíu.

Félög: Guarani, Internacional, Santos, Shaktar Donetsk og Manchester City.

Númer: 11