Ashton í landsliðið

Enskir fjölmiðlar greina frá því í dag að Dean Ashton verði valinn í enska landsliðið í næstu viku.

Steve McClaren, landsliðsþjálfari, valdi Ashton í fyrsta landsliðshópinn sinn sem mætti Grikkjum í ágúst í fyrra. En skömmu eftir það ökklabrotnaði Ashton á æfingu og þurfti að gangast undir tvær aðgerðir vegna þessa.

„Ég hef fylgst með honum frá undirbúningstímabilinu og hann kemur sannarlega til greina," sagði McClaren. Mikil meiðslavandræði hafa verið á enskum sóknarmönnum en þeir Michael Owen og Emile Heskey eru báðir meiddir.