Bale: Gæti orðið vendipunktur

Gareth Bale, leikmaður Tottenham, segir að endurkoma liðsins gegn Aston Villa í kvöld gæti orðið vendipunktur hjá liðinu. Tottenham hefur byrjað tímabilið mjög illa en náði jafntefli gegn Villa þrátt fyrir að hafa lent þremur mörkum undir.

"Við sýndum mikinn karakter og ég trúi því að þessi leikur geti komið okkur á beinu brautina. Vonandi hefur þetta síðasta mark leiksins gefið okkur það sjálfstraust sem þarf," sagði Bale en leikurinn endaði með jafntefli 4-4.

Robbie Keane skoraði eitt af mörkum Tottenham en hann lýsir yfir fullum stuðningi við knattspyrnustjórann Martin Jol. "Hann hefur fengið mikla gagnrýni að undanförnu. Hann hefur samt sýnt það hve góður stjóri hann er og hefur stuðning frá okkur öllum," sagði Keane.

Jol segir það mikið áhyggjuefni hve ódýr mörk Tottenham hefur fengið á sig. Varnarleikur liðsins hefur mikið verið í umræðunni en liðið hefur fengið á sig sextán mörk í átta leikjum.