Ótrúlegt jafntefli á White Hart Lane

Tottenham og Aston Villa gerðu 4-4 jafntefli í ótrúlegum leik í ensku úrvalsdeildinni í kvöld. Aston Villa komst í 4-1 í leiknum en heimamenn áttu ótrúlega endurkomu og náðu stigi.

Dimitar Berbatov kom Tottenham yfir með skalla eftir horn en Martin Laursen jafnaði skömmu síðar eftir hræðileg mistök frá Paul Robinson, markverði Tottenham. Laursen var síðan aftur á ferðinni og kom Villa í forystu.

Gabriel Agbonlahor skoraði þriðja mark Villa og staðan 3-1 í hálfleik. Craig Gardner skoraði síðan 4-1 áður en Pascal Chimbonda minnkaði muninn eftir að Jermain Defoe skaut í slá.

Robbie Keane minnkaði muninn í 4-3 á 82. mínútu úr vítaspyrnu en hetja Tottenham var Younes Kaboul sem skoraði undir lok leiksins og úrslitin 4-4.

Tottenham er enn í þriðja neðsta sæti deildarinnar en Martin Jol getur allavega glaðst yfir karakternum sem liðið sýndi í kvöld þegar staðan virtist vonlaus.