Chelsea saknar Eiðs Smára

Enska dagblaðið The Times segir að Chelsea hefði góð not fyrir Eið Smára Guðjohnsen á þessum síðustu og verstu tímum félagsins.

Joe Lovejoy, blaðamaður The Times, fjallar um jafntefli Chelsea og Fulham í ensku úrvalsdeildinni um helgina og gagnrýnir þá sérstaklega frammistöðu Andriy Shevchenko.

„Hann entist á vellinum í 54 gagnslausar mínútur áður en Claudio Pizzarro kom inn á í hans stað. Grant reyndi að framkalla þann sóknarbolta sem Abramovich vill sjá með því að stilla liðinu upp samkvæmt 4-2-3-1 leikkerfinu. Shevchenko var á miðjunni fyrir aftan Drogba, í þeirri stöðu sem Eiður Smári Guðjohnsen var vanur að leysa. Chelsea hefði góð not fyrir Íslendinginn í dag.“ 

Chelsea er nú í áttunda sæti ensku úrvalsdeildarinnar með tólf stig og eitt mark í mínus í markatölu. Liðið er sjö stigum á eftir toppliði Arsenal þrátt fyrir að hafa leikið einum leik fleiri.