Halifax bjargað af vefsíðu?

Fótboltafélagið Halifax Town er á barmi þess að verða gjaldþrota. Svo gæti þó farið að félaginu verði bjargað af vefsíðunni myfootballclub.co.uk. Vefsíðan er að fara að brjóta blað í fótboltaheiminum en í gegnum hana hefur almenningi verið gefinn kostur á að kaupa hlut í fótboltaliði.

Vefsíðan hefur stefnt á yfirtökutilboð í enskt fótboltalið en yfir 50 þúsund manns hafa tekið þátt í þessu og hver og einn aðili keypt hlut fyrir 35 pund. Þegar búið er að yfirtaka fótboltalið munu hluthafar geta greitt atkvæði á vefsíðunni um allar helstu ákvarðanatökur hjá liðinu, eins og hvernig byrjunarliðið eigi að vera og um kaup og sölur á leikmönnum.

Illa hefur gengið að rétta Halifax Town við og hefur talsmaður félagsins staðfest að viðræður við stjórnendur MyFootballClub hafi farið fram. Viðræður við ýmsa aðila um yfirtöku á félaginu hafa verið í gangi síðan á síðasta ári án þess að niðurstöður séu í sjónmáli.

Lögmaður MyFootballClub segir að málið verði skoðað. „Við erum að skoða hugsanleg lið. Á síðunni höfum við verið með könnun í gangi um hvaða lið hluthafarnir vilja helst eignast og þar er Halifax ofarlega svo auðvitað skoðum við þau mál."

Enginn knattspyrnustjóri verður við stjórnvölinn hjá Halifax ef MyFootballClub eignast félagið. Hinsvegar verður ráðinn sérstakur yfirþjálfari en hann mun fara eftir ákvörðunum hinna rúmlega 50.000 hluthafa á vefsíðunni.