Nánasti aðstoðarmaður Benitez hættur hjá Liverpool

Hægri hönd og nánasti samstarfsmaður Rafael Benitez, kanttspyrnustjóra Liverpool, hefur sagt upp störfum. Paco Ayesteran hefur fylgt Benitez allt frá því að hann þjálfaði Tenerife og síðan Valencia og hefur staðið þétt við hans lið þau ár sem Benitez hefur verið við stjórnvölinn á Anfield. Þetta þykir mikið áfall fyrir Benitez sem nú leitar logandi ljósi að eftirmanni Ayesteran.

Leikmönnum Liverpool var tilkynnt um uppsögnina í gær en Ayesteran hefur unnið náið með mörgum þeirra undanfarin ár. Ekki er vitað hvort honum hafi verið boðin framkvæmdastjórastaða annars staðar en fregnir herma að slegið hafa í brýnu á milli Ayesteran og Benitez fyrir skömmu.

"Paco Ayesteran hefur beðið um að fara frá okkur. Meira vil ég ekki segja að svo stöddu," sagði Benitez á blaðamannafundi um málið áðan.