United mun ekki kaupa Berbatov

Manchester United hefur neitað þeim fregnum að félagið hafi haft samband við Tottenham vegna hugsanlegra kaupa á sóknarmanninum Dimitar Berbatov. Umboðsmaður leikmannsins sagði í gær að United hefði haft samband við Tottenham og lýst því yfir að félagið vildi fá Berbatov.

„Við höfum ekki gert tilboð í Dimitar Berbatov," sagði David Gill, stjórnarmaður Manchester United, í yfirlýsingu. Tottenham staðfesti síðan að félagið hafi ekki fengið kauptilboð í leikmanninn og að ef það kæmi yrði því svarað neitandi.

Í síðustu viku bárust fréttir af því að einhver illindi væru hlaupin í samskipti Martin Jol, knattspyrnustjóra Tottenham, og Berbatov.